剪髮

今日剪髮個陣，我同髮型師講想短啲。
髮型師問我，「邊行咖？你係咪當差？」
我想答佢，搞藝術咖，但我冇講出口。
係佢既世界裡面，好似所有野都有一種形象。
我怕我講完，佢會游說我剷青電髮再吹飽自己啲手工藝偉史。

差唔多剪完，佢又問：「陣間去邊玩？」
我答：「冇呀，留係屋企。」
佢聽唔到，又問：「吓？」
「哦，都會行下街既」
「係啦，呢個你地既年青人世界黎咖喇！」

「咁短夠未呀？」佢前半段時間係咁撩隔離個女仔話識佢阿媽，後半段時間一邊剪一邊同後面個客傾計。
我認真摸摸個頭，話：「好似……」
「再短就唔靚咖喇，過節喇，要型丫嘛！」
「哦，好啦。」

洗完頭之後，佢幫我似乎gel左少少野……但我其實完全唔知佢做過乜，因為根本冇變化。

臨走畀錢，我手殘畀多左張五十，佢即刻話：「我地好老實咖小朋友。」

我感覺自己畀人分左三幾份，但呢啲一份份都冇被理解過。其實只係佢心目中既……某種存在，以及市值十幾分鐘加九十蚊既一個頭。