發現 09.12／11:54
在荒謬的時代，如果立法通過，我們的言論不再是受打壓，是被剷除、妖魔化、作為降罪的籌碼。我們不要再覺得自由是權利，那只是政府虛設的名堂，用來瞞騙發言的人只要依循規矩就得著安定。久而久之，全部人都會死，因為活在絕望中，卻慒然不知。這個法例如果是安心保障，那不過是麻醉劑，在殺戮前讓某些人錯覺會被治好。然後我們在安祥中離去。不願被注射的人，我們等著被隔離吧。
這世代跟往時無異樣，愈來愈多人遭殃是這地域的日常。人類社會，極權統治，我看不見太多例外。
姑且有人相信他們粉飾的太平。
起來 09.12／17:22
真係冇辦法再忍。知唔知究竟恐怖成點？我都係改歌出身，如果舊日唔係有咁嘅機會改完歌放上論壇share，自製MV放Youtube，引人歌詞引人link寫詞評share，引人歌詞做網上公開教程，我喺呢個世界可謂一無是處咁忘記乜嘢係創意，乜嘢係師生相授，香港音樂有乜鬼潛力。死讀書啦，做機械人啦，文藝史哲乜都浮雲一樣啦，有錢搵唔駛學做文明人咖喇，一定係咁。
第一步佢向純藝術落手，唔係，退後一萬步，佢喺咁多年嚟點樣從商言商排斥咗幾多傳統工藝商家，剷除幾多文化遺產，完全忘記藝術人嘅資源需求，係去到今日先將呢堆熔岩流到去網絡呢度，燒晒所有潛在創作人嘅「創作初衷」。咩時候都講，初心係最最最重要，當創作人連純藝術嘅創作意願都冇，就會即時反彈做返條可憐蟲。
冇人一出世就會諗到話整原創嘅時政評論作品。佢聰明呀，知我哋人馬夠多，唔玩針對性控訴，一嚟就拔根。諗真啲，所謂二次創作，其實就係第一身創作，唔好畀佢「版權問題」昆到。呢個係現代社會，所有創作意念都可以上溯或者指涉其他文本／作品，唔係講緊你有冇參考／抄考，而係佢話係就 點 都 可 以 告 得 入。
當有一日發現香港嘅網絡世界，再冇臨摹嘅作品（所有畫家嘅起始點），再冇借圖做背景加文字嘅金句文案流傳起嚟（媒體訊息／文化活動傳播），再冇音樂人由衷、安心、自豪嘅樂曲可以交流，讀者再唔敢分享鍾意睇嘅線上小說／漫畫，高登及各大討論區第一時間摺埋，香港網絡文化受到嚴重扭曲打撃落入罪責龐雜嘅白色恐怖之中，想講嘢？你肯定你仲可以喺咁嘅氣氛之中想講就講？點可能想像到後果？
呢招陰毒。如果日後成個網絡只可以剩返所謂戲仿、時政評論、諷刺呢堆概念，只容許呢種似乎可以同政府對抗嘅聲音，其實就係推我哋入另一邊冇諗過嘅極端。等厭惡嘅人離開呢個網絡，信心不穩嘅人放棄發聲，能力未到呢個門檻或境界嘅人抗拒創作，藝術人視網絡創作為不純粹，近乎國家機器、權力代表或人民惡意武器。網絡矛盾日益加深，極深，罵戰連連。當去到所有人已經墨盡心枯嘅時候，從此愈來愈多人撤離戰線，網民零散。
網絡23條呢條禁令，簡直就係送緊所有人上斷頭台。
沒有留言:
張貼留言